Сонце, топло време, раздвиженост и полни тезги. Полни раце работа за продавачите, изобилство производи за купувачите. Ваква беше сликата утринава на градскиот пазар во Штип. Цените исти како и претходниот петок, но исти се и примањата. Иако излегле да купат некои од основните продукти за прехрана, анкетираните штипјани, главно, пензионери, велат дека ниските пензии и не им дозволуваат многу да купуваат.
Најмногу се купуваше овошје, но и зелени зеленчуци, како зелка, марула, спанаќ и праз, како и компир. Раст во цените, според купувачите, немаше, а според продавачите денес можеше да се каже дека имаше добар пазар после неколку недели.
Според продавачите, пак, побарувачката е различна за секој производ, но луѓето купуваат, а сонцето, секако, им оди во прилог.
