Среде хаосот кој го предизвика руската инвазија во Украина, додека детонациите одѕвонувале ширум Киев, во метрото каде илјадници граѓани побарале спас, една жена имала и повеќе причини за страв од останатите.
Додека синоќа се криела од нападите во импровизираното засолниште во градот во кој беснеат пукањата, во околу 20 часот и 30 минути, оваа млада жена на свет донела девојче со име Миа, а нејзините крици ги слушнала украинската полиција која испратила помош.
Никола Шлапак, полицаец кој се нашол на вистинско место во вистинско време, раскажал дека ѝ помогнале да се породи, а потоа повикале Брза помош која мајката и бебето ги однела во болница.
„Вашето породување е надеж во ова сурово време“, извикувале присутните опишувајќи го настанот за кој сведочеле како вистинско чудо.
Фотографијата од мајката на Миа брзо се прошири во светот, а веста за раѓањето на малата Миа брзо се прочу на социјалните мрежи, пренесува „Дејли мејл“.
🇺🇦 Mia was born in shelter this night in stressful environment- bombing of Kyiv. Her mom is happy after this challenging birth giving. When Putin kills Ukrainians we call mothers of Russia and Belarus to protest against Russia war in Ukraine . We defend lives and humanity ! pic.twitter.com/qsBDcfc1Q9
— Hanna Hopko (@HopkoHanna) February 25, 2022
„Миа вечерва беше родена во засолништето и тоа во страшно опкружување, во текот на бомбардирањето на Киев. Нејзината мајка е среќна по породувањето. Додека Путин ги убива Украинците, ние ги повикуваме мајките на Русија и Белорусија да протестираат против војната меѓу Русија и Украина. Ги браниме животите и човештвото“, порачала синоќа претставничка на „Демократија на дело“, Хана Копско.
